༡ 

 དད་གསུམ་ཟ་མ་ཏོག་གི་སྣོད། ། 

 ངག་རིག་འོ་མའི་མཚོ་མོ་སྐྱིལ། ། 

 ཕུལ་ཕྱིན་དབྱངས་བདུན་རྫོགས་པའི་མར། ། 

 དགེ་ལེགས་མཆོད་པའི་བསྟར་ཕྲེང་བཤམས། ། 

 ༢ 

 མཛེས་སོ་སོ་དཀར་ཆུ་སྐྱེས་ཚལ། ། 

 བརྒྱད་གཉིས་སྟོང་ཉིད་གླུར་འགུགས་པའི། ། 

 སྙན་དབྱངས་གེ་སར་དཔལ་དུད་ཅན། ། 

 ལྗགས་ཀྱི་རྐང་དྲུག་སྟངས་སྟབས་རོལ། ། 

 ༣ 

 དཀར་གསལ་མ་འདྲེས་གཟི་མིག་སྤྱན། ། 

 དུས་གསུམ་སྐྱེ་འགྲོར་བྱམས་པའི་ངང་། ། 

 གཟིམ་མེད་གནས་པའི་དཔེ་འཇོ་ཉིད། ། 

 བཙལ་བས་མ་རེག་ངལ་བས་དུབ། ། 

 ༤ 

 ཚོགས་གཉིས་ཀུན་གསལ་ཡངས་པའི་མཐོངས།། 

 རབ་མཛེས་བཞིན་བཟང་རྒྱ་མཚོ་སྐྱེས། ། 

 བགྲང་ཡས་དད་འདུན་ཀུ་མུད་གཉེན། ། 

 འདབ་མ་འབུམ་ཚོ་གྲོལ་བའི་མཆོག ། 

 ༥ 

 ཉི་ཟླ་ཡོ་ལང་འཛུམ་པའི་དཀྱིལ། ། 

 མ་ཁྱེད་བཞིན་དཀར་ཟེགས་མའི་ཆས། ། 

 ཉིན་བྱེད་འབར་བའི་རིག་སྟོང་དབྱིངས། ། 

 སྐར་ཕྲན་ཟོལ་གྱི་མོག་པོར་བཏང་། ། 

 ༦ 

 མཁྱེན་གཏེར་གསེར་ལྡན་དགའ་མའི་ཕང་། ། 

 ཀུན་རྟོག་སྨིག་རྒྱུའི་ཞགས་པའི་ཕྲེང་། ། 

 ཐབས་ཤེས་བསིལ་མ་རླུང་འགྲོས་ཀྱིས། ། 

 རྒྱང་དུ་བདས་པའི་འཕྲིན་ལས་རྫོགས། ། 

 ༧ 

 མ་རིག་བ་ཚྭའི་ཆུ་ཐིགས་ཀྱིས། ། 

 དར་འཇམ་གོས་བཟང་མ་བངས་པར། །

 བཻ་སྔོན་ཞུན་མར་མཚོ་བསྐྱིལ་ཀློང་། ། 

 ངང་པའི་བུ་མོ་མཚན་གྱིས་གསོས། ། 

 ༨ 

 དེ་ཚེ་ཚངས་ཆེན་ལྷ་དབང་གིས། ། 

 བཞིན་བཟང་པད་མའི་ཚལ་ཆེན་དུ། ། 

 སྤྱན་རིས་ར་ཡིག་གཉིས་པའི་ཁྱུ། ། 

 མ་བོས་དལ་གྱིས་མགྲོན་དུ་འཁྱོལ། ། 

 ༩ 

 གསར་རིག་སྟོང་པའི་འཇའ་སྤྲིན་སྤུན། ། 

 མཚོ་མཐར་མཛེས་བྱེད་བྲེས་པའི་ཚུལ། ། 

 སྐབས་གསུམ་ཁྲུས་ཀྱི་རྫིང་བུ་ཡི། ། 

 མཛེས་དགུའི་འདི་ཀོར་འཕོས་ལྟར་རོ། ། 

 ༡༠ 

 སྣ་ཚོགས་འདབ་ལྡན་ཡོ་ལང་གིས། ། 

 མགྲིན་བཟང་རྫ་རྔ་བརྡུངས་པ་ལས། ། 

 བྱུང་བའི་སྙན་འཇེབས་སྒྲ་དབྱངས་འབུམ། ། 

 དབྱངས་ཅན་རིག་བྱེད་དབང་མོར་མཆོད། ། 

 ༡༡ 

 དྭངས་བསིལ་སྤོས་དྲི་འཐུལ་བའི་མཚོར། ། 

 ཞབས་སྐྱེས་ལྔ་ཟུང་འཁོད་པའི་ཤུལ། ། 

 དྲི་མེད་དྲི་བྲལ་གཟུགས་སྐུ་ཟླ། ། 

 སྐལ་བཟང་བསོད་ནམས་སྤྱན་དུ་འཕོས། ། 

 ༡༢ 

 དབུ་སྐྱེས་ལོ་མ་འབུས་པའི་སྟེང་། ། 

 ཟླ་ཕྱེད་འཛུམ་པའི་རླབས་ཕྲེང་གིས། ། 

 སྲིད་གསུམ་མཛེས་པའི་ཕུལ་ཕྱིན་པའི། ། 

 མེ་ཏོག་ཚོམ་བུ་ལྷུག་པར་དགོད། ། 

 ༡༣ 

 སྣུམ་ཚོམ་རི་མོའི་མཛེས་སྨིན་དཔྱིད། ། 

 སྨིན་མ་བསོད་ནམས་པིར་གྱིས་བྲིས། ། 

 འདོད་ཞེན་བུད་ཤིང་སྐམ་པོའི་ལྷས། ། 

 ཟུར་མིག་མདའ་དབལ་སྣུད་པར་བྲེལ། ། 

 ༡༤ 

 འོད་ཀྱི་ཟེར་མ་བྲན་པ་ཡི། ། 

 རྫི་མ་ནགས་མའི་འཛིངས་པའི་ཚལ། ། 

 རི་དྭགས་སྐྲག་གཤིས་གཡོ་བའི་སྤྱན། ། 

 རྗེས་ཆགས་གོམ་པའི་རྩལ་རྫོགས་མ། ། 

 ༡༥ པད་མ་རཱ་གའི་མདངས་འཕོས་པའི། ། 

 བིམ་པའི་མཆུ་སྒྲོས་ལེགས་སྨིན་པ། ། 

 ཡོམ་ཡོམ་འགུལ་བའི་ཆོ་འཕྲུལ་གྱིས། ། 

 འདྲེན་བྱེད་བྱེ་བའི་འཁོར་དུ་བསྡུས། ། 

 ༡༦ 

 མགུལ་བ་ཙན་དན་ལྗོན་པའི་ཤིང་། ། 

 སྣ་བརྒྱའི་རིན་ཅེན་ཡག་འདབ་གྲོལ། ། 

 བརྗོད་འདས་མཛེས་ཕུལ་དཔལ་ཡོན་ནི། ། 

 མ་ལུས་སྨྲ་བར་ཐུབ་མཆོག་ངལ། ། 

 ༡༧ 

 སེན་དཀར་བ་སོའི་ཕྲེང་མཛེས་ལྟོངས། ། 

 སྣང་སྲིད་ཟླ་བའི་འོད་འཁྱུག་པས། ། 

 ཞིམ་མངར་འོ་མའི་དཀར་མདངས་གཤིས། ། 

 སྐྱེངས་པའི་ཟོལ་གྱིས་དམན་སར་ལྷུང་། ། 

 ༡༨ 

 ལྗགས་རྩལ་གློག་ཕྲེང་རྒོད་པའི་ཤུལ། ། 

 ལེགས་བཤད་སྤྲིན་གྱི་མེ་ཏོག་འབུམ། ། 

 སྐལ་བཟང་གདུལ་བྱའི་སྙན་གྱི་ཚལ། ། 

 ལེགས་བྱས་དགའ་སྟོན་ཅི་དགར་སྩོལ། ། 

 ༡༩ 

 སྨྲ་སྒོ་པད་མའི་རྫིང་བུའི་དཀྱིལ། ། 

 དྲུག་འགྱུར་མགུལ་བར་ལེགས་འཁྲིལ་བའི། ། 

 རོ་འཛིན་འཇོལ་མའི་རྩེད་དགར་རོལ། ། 

 འཁོར་འདས་གླུ་བའི་མཚན་སྙན་བརྐུས། ། 

 ༢༠ 

 ལས་ཉོན་སྤྲིན་ནག་འཐབ་པའི་མཁར། ། 

 མི་འདོད་སྡུག་བསྔལ་སྤེལ་བའི་ཆར། ། 

 རྟེན་བཟང་ལང་ཚོ་འཇོམས་བྲེལ་དུས། ། 

 མ་ཁྱེད་ཐུགས་རྗེ་བསིལ་རླུང་རེ། ། 

 ༢༡ 

 མཆོད་པའི་ཚིག་གི་བྱ་མ་རྟ། ། 

 དད་སེམས་གངས་ཀྱི་འདབས་རོལ་ནས། ། 

 ངག་རིག་ཟླ་བའི་ཐོད་བཅིངས་པའི། ། 

 དབྱངས་ཅན་ལས་སྐལ་ལྷ་མོར་བཏང་། །

རྩོམ་པ་པོ། དབྱངས་ལྡེའུ།

རྩོམ་སྒྲིག་པ། མགར་རྒྱལ་སྲས།